هل تحسون بفرق بينكم وبين الناس الطبيعين
 

حاب استفسر هل تحسون بفروقات بينكم وبين الناس الي ماتعاني من شي لما تجلسون معهم وهل تعملون مقارنه

انا دايم اعمل مقارنه مع أي أحد لأن الإكتئاب ماتحسن معاي لوبس يصير تحسن كان تروح هاالاعراض لأن هذي أعراض الإكتئاب
وبرضو احس بفرق بيني وبينهم كبير هم ابدا مو سلبييين ومتفائلين ويحبون الوناسه والانبساط وحتا انا احبها لاكن الفرق اني ماقدر اعملها بسبب المزاج الخربان لو يرتفع ويصير وسط كان انحلت المصيبه
والله العضيم أني من سنوات طويله ماذقت طعم الفرحه والسعاده والضحكه إلى من القلب ومشاعر الحب من الناس
فعلا إلى سمى الإكتئاب سرطان النفس

مو دليل انهم مافيهم شي ماتدري عنهم اعرف ناس واجد يعانون معاناة لكنهم يطنشون ويشغلون انفسهم باي شي

شوف كل انواع المقارنة ظالمة الا اذا حاولت اتعلم منها

اما انك تظلم نفسك بمقارنة من الاساس مو صحيحة

يعني كمثال انت تقول الناس طالعه مبسوطة تستمتع بالخميس الونيس

و الحقيقة هي ناس مكروفة طول الاسبوع و هذي فرصتها الوحيدة للتغيير

طيب اذا تقارن نفسك بهم فما الجديد..

هل انت مكروف طول الاسبوع

هل انت تعلمت شي منهم

اظن ما تعلمت شي..

يعني ما استفدت شي.. و لا غيرت شي.. و لا كافأت نفسك نهاية الاسبوع و النتيجة صفر

هل هم يصلون او يبرون والديهم او يتصدقون او يدرسون او يشتغلون او يقرأون او يتريضون

؟؟؟

اخذ ادويتي بشكل منتظم ولا اهتم لما يراه الناس

انا افضل بكثير من الذين لم يمرضون نفسيا

نحن طبيعيين ولسنا مختلفين ، فقط نعاني من امراض لا اكثر ولا اقل وعن نفسي اعيش افضل من الذين لم يصابون بالمرض لاني استمتع بكل لحظه اعيشها

( عايش بغربة و أنا بوطني ) هذا اللي أحسه - إحساسي بالغربة :(

ما أخفيك بعض الأحيان تجذبني المقارنة من غير قصد و لا شعوريا خصوصا إذا كنت برى البيت

حتى إني أشوف الأجانب تضحك و تسولف و بأعمالها و راضيه بمقسومها و تسعى ورى رزقها و رزق عيالها اللي بعد ألاف الأميال و أنا محلك راوح وحيد لا صديق و لا رفيق و لا طريق أتبعه

و موضوعك بالنسبة لي غريب تدري ليش هههه لأنك ما قلت إن الموضوع لا يشمل المضطربين وجدانيا ثنائيي القطب :)

و الله و أنا أخوك يا خالد ما أبغى أتشكى لكني محروم لا وظيفة و لا زوجة و لا عيال و لا مزاج زي الناس الطبيعيين :( و تبغى الصحيح و لا حتى عقلي بعقل واحد عاقل و عمره 36 ما أدري بس هذا متأكد منه و لا أدري ويش التصنيف اللي يندرج تحته عقلي الغريب

إلى متى و النوم ما يجيني إلا بأدوية و لما أنام كأني نمت ساعة وحدة

أخواني أصغر مني بوظايف و ببيوت و متزوجين و مخلفين كتاكيت و سياراتهم فارهة بس الحمدلله ما قارنت نفسي بهم و راضي بقضاء الله و قدره و إن شاء الأمور تزين لي و لك و لكل مسلم

أنا عقدتي المزاج و العقل و لما أقول العقل يعني التفكير و التنسيق و حساب الوقت و الترتيب للمستقبل مو إني حمار غبي هههه بس تبغى الصدق جحش من ذاك الحصان :(

ايوه كثير اقارن نفسي ببنات غيري..

لكن سبحان الله من كثر ماصرت اتقن اني أخفي ألمي وتعبي وحده تعبت من القولون وجاها اكتئاب كلمتها وهديتها وقلت ترا انا كذا واحاول اهديها
انصدمت صدمه قويه قالت مستحيل انتي تعبانه
وقتها عرفت قلت يمكن قابلت بنات كثير مخبين ألمهم مثلي
الحمد لله ربي على كل شي

فرق كبير جدا

ايه فرق بين السماء والارض ذولك وظايف طلعات سفاريات يجتمعون بستراحه او مجلس وكل يوم عند واحد عشاء وتواصل بينهم حتى ابرامج الجوال وانا كلن ساحب علي من اخوان وخوات وقرابه يشفوني مريض منتهي فقط لاني مريض اكتئاب .. مافيه الا امي تدق علي وتعطيني فلوس اتعشاء واتغداء وافطر من المطاعم . ماقدر اتوضف عجزت اشوف الوظيفه حرب اخاف من حتى من طاري الوظيفه والعمر يمشي والناس ماترحم اه من المرض تعبني يااخي الاكتئاب يخليك ضعيف مكسور ماتقوا شي لا وظيفه ولا زواج ولا مقابلة احد ولا تقدر تنهي حياتك لإن فيه عذاب وحساب يعني كذا كذا مانت مرتاح كل اللي اعرفهم من اخويا وعيال خاله وعيال عم وقرايب تزوجوا وتوضفوا وانا الوحيد اللي طايح بالغرفه . الا فرق وفرق شاسع جداً جداً جداً ..

ي صاحبي اعتبرني اخوك و اعطيك نصيحه من شخص محب لك بكره احزم امرك وتوكل على الله سبحانه و ابحث عن عمل اقل شي لين تشتري سياره وبعدها اذا شفت الوظيفه جدا جدا لاعبه بنفسيتك اتركها وسجل في اوبر وترزق الله اهم شي تخرج من مكانك اقل شي توظف حارس امن مافيها مقابله مع الجمهور ولا فيها مقابله واجده مع المدير عملك حراسات الين تشتري سياره ورح اوبر اهم شي تشتغل

انا توظفت بثلاث شركات و حاربت الاكتاب شر محاربه اعتبره عدوي لي اعدله م استطعت الحين بشركة ولازلت مكافح وبعدين اوبر ترا تغيير جو تطلع من البيت وتتمشي فكر بكلامي طيب اكيد اكيد تسأل كيف ابدا م عندي سياره اروح بعيد كيف اقدم وين اروح اسأله كثيره تدور بخاطرك و الله كل شي ميسر بزمن ذا تابع معي ^^


حاليا كثير قطاعات متسعوده ويدورو سعوديين لجل كذا روح اي محل من القطاعات المتسعوده جنب بيتكم سوا محل ملابس او محل حلويات او اي محل يطلب ^^ واذا خايف من نظره الناس لك شيلها من راسك ترا محد بيعطيك فلوس وانت جالس اقل شي ضحي لجل توصل لهدف معين شي انت تبي تبنيه لنفسك حتى لو راتب قليل جمع راتبك كم شهر و اشتر سياره وزي م قلت لك خلك في اوبر و الله يرزقك ي رب جرب طريقتك وكل يوم قول لنفسك هذا يوم كفاح جديد وتحدي جديد حتى لو رحت مقابله شخصيه وفشلت اجمع نفسك ورح اكثر من مقابله لين الله يفجرها لك بتوفيق ^^

كثير يقارنون انفسهم بي
الحمدلله

يقارنون أنفسهم بي كأني قدوة عظيمة ولا يعلمون شيئا عن صراعاتي وهواجسي وأفكاري المؤلمة وضعفي الشديد

المقارنات حالة من الظلم على النفس وعلى الآخر
وهي كانت سبب في تعنت الشيطان عن الإنصياع لأمر الله تعالى بالسجود لآدم عليه السلام

لكن إذا كنت ستقارن حالتك قبل وبعد والعودة بنفسك لماقبل الإضطراب
فربما يكون شيء من محاولة البحث عن العلة والحل وقد يبدو به فائدة

مشكور يالغالي على النصيحة ايو الله اخوي وتاج راسي بعد ، بإذن الله احاول اغير افكاري ودور اي وظيفه شاكر لك مرة اخرا على النصيحة

المقارنة هي موت على قيد الحياة . تنتفي فيها العدالة والايجابية وقبل ذلك الرضا واليقين الذي هو أساس الراحة .

ربي معاك

انا اشهد انه فرق كبير وفرق السما عن الأرض لو بنعدد الفروقات كثيره جدا وذكرها الأخ سلطان وبونجلا
وبونجلا ذكر شي مهم انه العقل تحس انه أصغر من العمر رغم اني اعلم ويعلم الحبيب بونجلا انه عقولنا كبيره ولاكن يمكن بسبب ان مانقدر نجاري الناس الي ماتعاني من شي فنحس بهالاحساس

اتمنى ربي يعطيني ويعطيكم لحد الرضى في ايه واضحه وصريحه (ولسوف يعطيك ربك فترضى) انا ابغاها تتحقق واشوفها بالواقع فاقرب وقت لي ولكم ان شاء الله والحزن يذهب بلا عوده وتنفك العقده وكل شي سلبي

ولله ياخالد دماغك يحتاج فورمات فقط مافيك شيء لانك مليتو برمجيات سلبية تسمع كلامي تروح تاخذ خبطة كهرباء من اللي يحبها قلبك ولما تصحي تقول انا مين ؟ دماغك ياصبري دوخك سبع دوخات وخلاك كل يوم براي مرة تقول شيطان وحسد والحين تعترف انو مرض هههههه جرب تاخذ كاس بيرة والا خمرة محلية عشان تجرب تنبسط يومين

يارجال لوفيه فورمات للمخ كان عملت فعلا مخي متشبع سلبيه بس انا احس انه من الاكتئاب وثانيا فعلا انا مصاب بمرض روحي وسببلي الأعراض النفسيه لو بتتابع الرقيه تعرف ان الروحي يسبب نفسي
اخ لو موجود سميرا نوف كنت خذت وارتحت شكلك كل أسبوع تشرب يامصطفى 😁

تدري هذا اقصر طريق للتعاسة
مقارنة نفسك بالآخرين
وانك تتحسر على شيء مو بيدك
ونظرك مقصور على المفقود بس

بهالدنيا لازم تتعلم تتكيف وتتعايش
مع اي شي ما لك يد بتغييره
والعكس يكون عندك ارادة للأشياء اللي تقدر تغيرها

وياليت الواحد يقارن وضعه مع اللي اقل منه
ياليت يتأمل في النعم اللي عنده ويفكر ان غيره محروم منها
هذا اقصر طريق للرضا والقناعة

جلسات الكهرباء بتعمل فورمات خصوصا لو ست جلسات بالجهاز القديم

صحيح ان الصحه ثمينه
لكن ما توصل اني اضيع عشرة سنوات من عمري في التسخط وازيد نفسي الم

شي فضيع والله