مآهو الفزع أو الهلع
 

طيب بسأل أخوي هل بين النوبات ممكن تجيكم حالة تتكرر كثير لمدة ثواني معدودة أو كم دقيقة تكون خفيفة ومافيها كل الأعراض .. بس صدرك يضيق شوي يكتم شوي نفسك وتحس بقلبك وبطنك شوي كأنه يمغصك ويطلع الضيق لفوق للصدر ..
مايكون معها رجفة ولا تسارع نبضات القلب زي النوبة ولا التعرق ولا الدوخة أو الخوف الشديد من الموت مثل أو الأعراض الثانية يعني مايلاحظونها الاخرين عليك بسهولة بس تخليك تفكر شوي لين تفك هالضيقة
وتتكرر كثير بسيطة تكون لكن متكررة واجد تجيكم أو بس عندي ؟

^
إلا أخوي أنا مشخص معاي نوبات الهلع وتجيني قوية جدا لدرجة مرة من كثر الهلع انشلت رجولي تماااما ومنهارة وبس أبكي وماأقدر أتنفس وقلبي حسيت بيوقف وودوني عالطوارئ وانخرشوا وطلع كل شيء سليم ..
وأحيانا مع النوبة ضغطي يطير فوق بالعالي أو أدوخ أو أحس للحظات كأني أسبح أو بحلم وللحظات يوقف إحساسي بالمحيط الي حولي أو أشك فيه أقول أنا فعلا موجودة الحين هنا أو لا << شعور كريييه مدري وشلون بس يحسسني كأني فاقده لعقلي مدري وش هالشعور ..
أنا الحمدلله نوباتي مقارنة بغيري تعتبر قلييلة يعني ممكن أحيانا يمر شهر ماشفتها الحمدلله لكن جدا جدا قوية
بس أنا أقصد بين النوبات يجيكم هالشعور بشكل متكرر؟ ويكون قصير مجرد ثواني أو دقيقتين ويروح بس يرجع بنفس اليوم كم مرة وكل ماجاني أقول عسى ماتكون نوبة قوية وأنا ماعندي أحد بالبيت :(
وبحكم شخصيتي القلقة والوسواس القهري الي عندي يزيد الطين بله فما أتهنى بشيء بحياتي كله فكر بالجاي وخايفة منه ..
عشان الأعراض الي أقولك تجيني فترات قصيرة بين النوبات رحت اليوم حللت فيتامينات وصورة دم .. أنا خوفي كله يكون البلا بمخي أو أعصابي :(

هههههههههههه ضحكت على ختام كلامك
الله يشفيك
هذا هو حالنا وكانك تتكلمي على لساني بس انا تطور الى هلع الحديث امام الجمهور

تدري مرة رحت لاستشاري أعصاب وأنا ضامنة مليون بالمية إني مريضة وفيني تصلب لويحي أو مرض بالمخ وبس أقول مهما قالي بحتسب وبصبر المفروض ماأجزع << ماسك معي الوسواس مرررة
ويسوي فحص ماشاف علي إلا زي الرجفة وكذا طلب تحاليل وكله سليم بالنهاية عطاني اندرال عشان يوقف الرعشة .. المشكلة الاستشاري كبير وله صيته لكن انا جاء ببالي إنه مايعرف وأكيد لسه ماشخصوا الي فيني ..
وكل ماجتني نوبة هلع أضيف الأعراض الي فيها وأبدا أشخص بنفسي .. والله الظاهر مابقى تحليل ولا أشعة بالدنيا ماسويتها .
وعلى فكرة اندرال واسمه العلمي بروبرانولول مناسب بجرعة 10 مجم حبتين يوميا أو 20 مجم قبل المواقف الي بتتكلم فيها قدام الناس لأنه يوقف الأعراض الجسدية زي الرعشة وهالأمور بس لازم تستشير طبيبك أول لأنه مايناسب أي أحد ..
المشكلة إني أحيانا خلاص أكلم نفسي وأقول هذا غلط ووسواس المفروض أطنشه وماأنغمس فيه بس شيء جواتي كذا يصر يصر لحد ماأستجيب له وأبدا أفكر ..
الحمدلله على كل حال دايما شوف الي أقل منك صحة ترتاح وأهم شيء علاقتنا بربي تكون كويسة الله يصلح الحال والأحوال ..

أخي ..
أنا منذ 8 سنوات حتى الآن أعاني من وسواس قهري بخصوص فكرة معينة براسي كان الوسواس قوي جدا جدا جدا ووالله إنها كانت من أكثر لحظات حياتي بؤسا وتعذيبا والحمدلله الحين أخف لكن مازال ..
ومن 4 أو 5 سنوات بعدأ معي وسواس المرض وهذا مستمر إلى الآن ..
الوساوس هي أول شيء بدأ عندي ..
أنا من ولدت وشخصيتي قلقة لأني نشأت على أيدي والدين قلقين وموسوسين ببعض الأمور كالعين ومثلها فكانوا حتى الزكام يوسوسون إنه عين أو مرض كبير أو شيء فأثر ذلك فيني كثيرا واكتسبت من عاداتهم ..
قبل سنة ونصف تقريبا بدأت معي نوبات الهلع وماكنت أدري إن فيه شيء بها المسمى فكنت دايم أوسوس إنه مرض عضوي - بما إن الوسواس عندي من قبل - وأعمل تحاليل وأشعات وأهلي يوسوسون إنه عين ومدري ايش ..
القلق والدقة بدا يأثر على أشياء بحياتي فرحت للطبيبة وجلست أحكي لها بكل شيء فاجأتني إن الي يجيني فجأة يعرف بنوبات الهلع وليس مرض عضوي كما كنت أظن ..
المشكلة إني مو بس عندي الهلع عشان زيكم خلاص أقتنع وأرتاح .. عندي معاه الوسواس فأخاف وأدور تبريرات ثانية وأحس أعراضي عشان شيء عندي بالدماغ والرجفة لما تجيني مع الخوف أحس أعصابي فيها مرض ..
ومع كثر التفكير وتراكم هالأشياء صرت ماأنام ويجيني اضطربات بالنوم ونوبات الهلع صارت تكثر علي بنومي وجايني وسواس جديد لما أنام أحس فيه شيء وراي أو تحت السرير أو بالسيب حق الغرفة فأقوم أشيك كل شوي ونا مفزوعة وماأنام إلا والنور كله مفتوح ..
الحالة الي تجيني الضيقة الي تطلع والكتمة تجيني لما فهمتني إنه نوبة هلع والناس يفكرون بين النوبات صرت أفكر فيها أنا غبية كأني أستدرجها بنفسي بس أنا طبعي وسواسية هذا غصب عني ..
يارب فهمت علي أخي
أنا مو مقتنعة بكلام الأخصائية إنها أول شيء تبدا بعلاج نوبات الهلع أنا أحس المفروض تعالج القلق والوسواس الي فيني لأنه إذا راح احتمال يروح الهلع معاه لأن هذي الأمور هي الي تحفزه وتخليني مضطربة طول الوقت... أنتم وش رايكم كلامي صحيح؟
بعدين كيف ممكن أتغلب على الوسواس يعني مثلا يجيني فكرة إن أحد وراي وأرتعب مرة وأقرر ماألتفت لأن عارفة متأكدة ماوراي أحد أقاوم أضطرب مرة وألتفت بالنهاية .. الحالة هذي جايتني من قريب ومرهقة جدا جدا

متى بدا معك المرض
انا بدا في حدود عشر يعني في طفولتي

القلق منذ صغري جدا وأنا قلقة لذك انا الطفلة التي لم تحظ بطفولتها كنت طفلة أحمل هم وقلق وكأني وزير للدولة.. الوسواس من عمري 11 سنة تقريبا ..
الهلع من سنتين << ومااكتشفت إنه هلع إلا قريب بالتشخيص كنت أحسبه مرض عضوي كون لدي وسواس توهم المرض أساسا..
أنت من ايش تعاني؟ وكيف تعالج؟

أخي أنت من أين؟ وهل أنت مريض نوبات ذعر أم أخصائي ؟
ومانوع الأسئلة لو تكرمت

ماشاء الله الله يتمم عليك ويرحمنا برحمته ..
أخي بإمكانك السؤال هنا أنا حاضرة إن شاء الله بالخدمة