السلام عليكم ورحمة الله وبركاته .
قبل لا ادخل على طول بالموضوع ، بس حابة اقول اني لي فترة طويلة جدًا وانا اتابع هـ المنتدى ، وأشوف مواضيعكم ومشاركاتكم ، بالذات لما يشتد علي الوسواس .
انا كان عندي وسواس الموت ، وهو اول وسواس أصيب به ، والحمد لله بفضل من ربي ثم إيماني بنفسي قدرت أتخلص منه . مو بيوم او يومين ، ولا شهر ولا شهرين ، المدة استمرت معي 4 سنين متقطعة ، ما فيه شيء صعب ولا شيء مستحيل ، فيه أمل دام احنا واثقين ان ربي معنا ولا راح يتركنا .
الهدف من الموضوع ، ان فعلا كنت احتاج شخص قد عانى من هذا الوسواس وتشافى منه نهائيًّا ، كنت فعلا محتاجة اشوف هالشخص اتكلم معه ، ايش سوا ، ايش فعل ، كيف قدر يتخلص ؟!
راح اكتب لكم ايش كان يصير معي ب مختصر شديد : بدايتي كانت قبل 6 سنين تقريبا او اكثر ، كنت انام لوحدي عادي او مع اختي ، يوم من الأيام سمعت صوت ف أذني شخص يكلمني ، قمت مفجوعة من النوم ورحت لامي احكيها فقالت لي لا تخافي وان هذا مجرد حلم ، لكن ما صدقت انه حلم ، لان انا متاكدة اني سمعت احد يكلمني ، رجع لي الصوت شخص يتكلم معي بصوت مبحوح يقلي ( خطر ، راح تموتي تاريخ ---- ) من وقتها بدا معي الوسواس ، كان يجي ويروح يجي ويروح. قبل 6 شهور تمكن مني الوسواس لدرجة حطيت لنفسي تاريخ راح اموت فيه ، اي خبر ف التلفزيون عن الموت اقول في نفسي هذي دلالة ، لما اضحك قلبي يعورني وافتكر اني بموت ، لما اطلع لصديقاتي او اهلي ، اقول في نفسي انا أودعهم وأنهم ماراح يشوفوني مرا ثانية ، كنت لما اصلي اقول ايوا انتي في نهاية عمرك ولو صليت راح تكون اخر صلاة لك ، كنت انتظر ينزل ملك الموت ، ما انام في الليل انتظره يطّلع لي ! وكل مامرّ يوم قلبي ينقبض من الخوف لان اليوم قاعد يقرب ، لما تجيني نوبات الهلع كنت اعرق وارتجف نبضات قلبي تسرع تنفسي يقل وألم في البطن . والاحلام كلها لما أفسرها تكون بقرب الأجل . اسوء ايام حياتيك كانت لكن الحمد لله على كل حال .
الحل :
بيدكم إنتوا ، والله بيدكم ، كثير كانوا يقولون لي هالكلمة ولا فهمتها ، انا راح أوضحها لكم . اول شيء تسويه انك تحطي في بالك انه وسواس ، وانه شيطان ، قاعد يوسوس لك بس عشان يخوفك ويخليك متضايقة وكئيبة ، عشان يعيشك عيشة كلها نكد وحزن وبكاء . الدليل ان كم شهر وانتي على الحال ذا؟ هل صار لك شيء؟ ولو كنتي زيي وتحددين يوم مثلا للموت ، جا اليوم وراح صح ولالا؟ وانتي الان قاعدة تقرين كلامي! وعشان تقنعي نفسك انه وسواس مو شيء سهل ، تحتاجي شهر يمكن بس عشان تقنعي نفسك وعقلك وقلبك ان هذا وسواس ، كل ما فكرتي بالموضوع قولي هذا وسواس ، غيري مكانك قومي عند اهلك كلمي صحباتي اقري قران استغفري ربك قومي الليل ادعي الله انه يساعدك خلي عندك أمل وثقة فيه . ولما تبغي تخرجي والشيطان يقلك انو ذي اخر طلعة لك ، لا تقعدي ف البيت! اطلعي واضحكي من قلبك ، انا كنت أسب فيه! كنت دايم اقول ( انت وسواس حقير ، ماراح أخليك تسيطر علي ) يوم انجح و 10 ايام لا . كثير اقترحوا علي علاج كيميائي لكن انا رفضت ، الادوية لها فوايد كثير وراح تساعد فعلا لكن انا كان في شي بداخلي يقلي اني أقدر أتغلب عليه بدون الادوية والحمد لله قدرت .
- خليك واثقة انه وسواس
- حقريه
- استغفري الله وتعوذي من الشيطان
- تكلمي مع شخص ممكن يفهمك
- أقري قران كل ما حسيتي بضيق
- حطي ف بالك ان الموت حق وان الله ماراح
يعذب المسلم بالتفكير فيه والإحساس فيه ، ربي ارحم علينا من امهاتنا .
- حطي ف بالك لو كل شخص حس انه بيموت قبلها ب 40 يوم ولا 30 يوم كان الأغلب صار عنده اكتئاب قبل ما يموت .
- خلي عندك امل بان الله راح يكون معك وراح يشيل عنك هالحمل .
- اشغلي نفسك قد ما تقدري .
- مو انتي لوحدك او انت ، اللي مريتو فيه ، كثير نفس الحالة باختلاف الأعراض ، والحمد لله عدو منها .
ما اقول اني شفيت تماما من الوسواس! لان بعد ما انتصرت على وساوس الموت ، جاتني بعدها ب أشهر قليلة وسواس في عذريتي ، واللي اعتبره اسوء وأقبح من الموت ، وتمنيت ان وسواس الموت يرجع لي ولا اشك في يوم في عذريتي ، مع انني لم أقم بشيء يسبب في فقدان العذرية والحمد لله اني فتاة محافظة على نفسي الا ان الشيطان يتصيد اقل مدخل وأسخف مدخل حتى يبدأ ب رحلته اللعينة ومازلت أعاني من هذا الوسواس ولكن مستحيل اتركه يتغلب علي ، باذن من الله ثم ارادتي.
وبعدها أصبت ب وسواس الحمل! اي مكان يكون فيه رجال ما اقعد فيه ، اخواني ما اقدر اسلم عليهم ، اخاف يكون ف يده حيوانات منوية! ما اقدر استخدم المرحاض بعد رجال! ولو تأخرت الدورة ايام بسيطة اول شيء يخطر ف بالي اني حامل ، وتبدا الاعراض تجيني! سبحان الله كيف العقل يشتغل بمجرد تفكير ف فكرة معينة؟ احس ب دوخة وغثيان واي شيء أكله استفرغه - وأنتم بكرامة - .. كان يوسوس لي الشيطان ويقلي روحي حللي ، وأروح أحلل وكان يطّلع ما فيه شيء ، كيف سمحت الشيطان يلعب بي؟ الانسان ضعيف من الداخل فعلا .
اسفة جدًا على الاطالة ، دعواتي لكم من قلبي ان الله يعجل بالشفاء لكم جميعا ويبعد عنكم الوسواس للأبد ، وأدعو لي ان الله يستر علي ويبعد عني هذه الوساوس المزعجة .