|
تعبااان والله .. قصة حياتي وحالتي بالتفصيل
السلام عليكم
مساء الخير عليكم جميعاً ،،
هذا اول موضوع اكتبه ومحتار بأي قسم انزله من كثر الأشياء الي أعاني منها ،،
في قسم الرقية ، أو نوبات الهلع ، أو الاكتئاب ، أو .. أو ..
محتار واختلطت علي الأمور ، الناس تفتي كل من جهة ، الي يقول مصاب بالعين وتحتاج رقية ، والي يقول اكتئاب وتحتاج علاج نفسي
ما أدري من أصدق و وش اسوي !!
أشتكي من القولون من سنوات لكني مطنش وآكل الأشياء الي احبها مع انها تزيده ..
استعمل دسبتالين ودغماتيل وعلاج حموضة لكن بدون فايدة ،،
وصلت حالتي الى الطلاق وفقدان سيارتي بحادث ووظيفتي ،، وقالوا عين ، جلست فترة اتعالج عند مشايخ
واتجهت للطب النفسي حتى الدكتور يقول انا مستغرب انك مبتسم وانت تحكي عن حالتك اول مره اشوف احد عنده اكتئاب ويبتسم ووصف لي سيروكسات ومن اول نص حبه تعبت تعب شديد وتركته ، جلست سنوات على هالحال ..
بعدها دلني صديق على شيخ وجبته للبيت وقرأ علي وعلى البيت وحط بأنفي شي مثل المسحوق وقال داوم على سورة الرحمن ، ساءت حالتي
بعدها بعدين تحسنت وتزوجت مرة ثانية واشتريت سيارة جديدة ، مشت اموري تمام الى ان جاء يوم وطردتني امي من البيت دون سبب لانها لاتحب زوجتي
طلعت واستأجرت شقة بنفس اليوم ودفعت 6 شهور مقدم ، بعدها انتكست وساءت حالتي من جديد ...
حالياً صار عندي خوف وتردد في البلع وصرت اكره الاكل ونزل وزني كثير .. عندي وقت فراغ يخنقني لاني ما اعمل وافكر كثير جداً .. ما اقدر اعمل ولا اسوي مجهود اتعب بسرعة .. اعتقد سبب مشكلتي الفراغ والتفكير الزائد ممكن احد يقول اشغل نفسك الكلام سهل كيف اشغل نفسي وانا مالي نفس اعمل شي ومزاجي متعكر .. والعصبية
كتبت موضوع هنا للدكتور عماد الاتروشي وقال كويس ماقلت بانتحر على كثر هالمشاكل الي فيك ومستمر بالحياة وتطلب العلاج دليل قوة الشخصية وماعطاني حل شافي غير بعض النصائح المحفّزة ..
اميل للعزلة والوحدة وكرهت الناس وما ارتاح الا بالبيت ،، عايش بالاسم فقط ولكن فعلياً ميت والناس حولي عايشه ، حالتي المادية جيدة ومع ذلك ما استمتع بالحياة واكره السفر ولو رحت مدينة ثانية كأني جالس على نار ابي ارجع للبيت وحتى لو مو مدينة ثانية لو بنفس المدينة ماحب اطلع الا مشاوير سريعة واشتري اغراض وارجع ،،
فقدت الرغبة في عمل شيء وفقدت لذة الحياة كسل خمول حتى الصلاة احياناً أتركها فيه شي يمنعني عنها ، ايام اصلي واقرأ قرآن وايام لا
قاطعت المناسبات من زواج وعزاء وغيرها وجتني انتقادات كثيرة ، اذا توفي احد من الاقارب يجيني رعب وافكر بالموت واخاف ..
احس اني مقيد وماني قادر كيف اوصل للعلاج رافض اروح لطبيب نفسي ولا راقي شرعي تسألني ليش رافض اقول ما أدري كذا مالي نفس اعمل شي ولا اروح لأحد .. محتاج احد ياخذ بيدي ويعالجني غصب عني ومافيه احد مهتم .. محد يسأل عني غير أهلي وجوالي يجلس بالأشهر لا اتصال ولا رسالة من أحد الين حسيت اني غير مرغوب بي ولا عندي اصدقاء لاني معد اتواصل معهم ولا أرد الين معد صاروا يسألون .. وأصدقاء النت معد اتواصل معهم احس اني مربط ومزاجي دايم متعكر واشوفهم سخيفين وسطحيين وتافهين ويتكلمون بأمور تافهه وانا شايل هموم الدنيا فوق راسي وافكر بأمور اهم منهم حتى انهم سموني دراما كوين ☻
قرأت دراسة ان مدينة الرياض تجيب الاكتئاب نمط الحياة فيها وعدم وجود ترفيه ، اتمنى اعيش بأوروبا او امريكا او كندا وفكرت بالهجرة لكن خايف من المخاطرة خايف افشل واخسر كل شي هنا، فكرت اسافر لها فترة وارجع وبرضو خايف امرض هناك وماعرف احد هناك يوقف جنبي ..
اتمنى فعلاً اني اطلع من هالحالة واعيش طبيعي لكن اعتقد الله خالقني كذا وراح اعيش كذا الين اموت والحمدلله على كل حال .
فيه نقطة نسيت اذكرها وهي اهم من الكلام الي كتبته كله ..
مشاكلي بدأت منذ وفاة والدي عام 2001 قبل هالتاريخ وقبل وفاة والدي كنت عايش ملك ومستقر نفسياً ..
هذي هي قصة حياتي والحمدلله على كل حال عندي يقين ان ما أصابني فيه حكمة وخير أجهله .
|