اخوي منتضر الفرحة

شف قال الله تعالى((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى * قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا * قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى))[طه:124-126]، يقول: هل هذه الآية على كل شخص يغفل عن ذكر الله؟

هذا وعيد شديد لمن أعرض عن ذكر الله وعن طاعته فلم يؤد حق الله، هذا جزاؤه، تكون له معيشة ضنكا وإن كان في مال كثير وسعة لكن يجعل في عيشته ضنكاً، لما يقع في قلبه من الضيق والحرج والمشقة فلا ينفعه وجود المال، يكون في حرج وفي مشقة بسبب إعراضه عن ذكر الله وعن طاعة الله جل وعلا، ثم يحشر يوم القيامة أعمى. فالمقصود أن هذا فيمن أعرض عن طاعة الله وعن حقه جل وعلا، ولم يبالِ بأمر الله بل ارتكب محارمه وترك طاعته جل وعلا، فهذا جزاؤه، نسأل الله العافية.

يعني اخوي منتضر بالله عليك كيف تبي تطيب وانت :
1- صاد عن رب العالمين.

2- التثاوب هذا دليل ان فيك عين والعين اللي فيك لها مدة طويله يعني ابقولك بصراحه فيه احد من ربعك الحثالة تكرم اللي انت عندهم دايم يجيبون سيرك اتوقع بأكلك او انك انسان تحب الشغل راعي مكده أوفيك شي ما هو فيهم وما راح تطلع العين عن الامور هذي صدقني وبعدين الجني ليه يعزلك عن الناس وانت ما شي على كيفة ما انت بتصلي وهذا اهم شي ولا تقرا قرآن يا سلام سلم خلاص لو يحصل لك شيء ارض جوا بالنار الله لايجعلك من اهل النار الله لا يجعلك الا من أهل الجنه قل آمين .

3- صحبك اللي انت تمشي معهم كلهم فاشلين مع احترامي لشخصك والله لو يجيك من صواديف الزمن ما تلقى اللي حتى يسلم عليك الا كان عندك شي يتمصلحون منك لا والله يبي يمشون معك واذا قضت حاجتهم منك والله حتى السلام ما يسلمون عليك اخوي اسأل مجرب والله ثم والله ثم والله أن ربعي ابشرك واجد لكن يوم جاء وقت الجد اقسم بالله ما صفى منهم الا اللي يخافون الله ليه لأن صحبتهم ما هي لمصلحة لا لله بالله .

4- اخوي اعذرني أنا اللي بقلبي على لساني ما دري يتبين لي انك تشرب دخان وما ادري سامحني من كلامك كيف تبي تطيب وانت تشرب دخان ؟؟؟؟؟؟ تدري انه يجدد الجروح واللتهابات في المعده والقولون يمكن تقول هذا الناس كلها تشرب دخان ما جاها شي طيب راح اسالك سؤال هل الناس مناعتهم وحده وخلقتهم وحده لا يختلفون فيه ناس تأثر وفيه ناس لا وانت من الناس اللي تأثر لذلك كانك تبي تطيب الدخان حط عليه علامة اكس أقل شي وقت العلاج .

5- اخوي انت جاك اكتئاب وعلى طول ما صدقت خبر ورحت لدكتورنفسي وهذا اكبر خطأ تدري ليه لأن كثرة استخدام الحبوب راح تزيد اللتهابات المعده وتسبب قروح وارح تزيد اعراضك او ما تترك العلاج النفسي لأنه مخدر فقط ما هو علاج وانت اساساً مشكلك التهابات بالمعده والقولون .

6- شف والله ما عرفك لكن تعرف الشخص من خلال كتابته صحيح انك انسان عصبي والكلام اللي تقوله من حر ما توجس لكن فيه صفه حاب اقولك عنها في الانسان العصبي وهي الطيبه والفزعه وانا متأكد أن فيك خصال الرجوله تدري وش معنى الرجوله انت فزاع وشهم بس ما بعد عرفت نفسك واللي جاك هذا متأكد مليون بالميه فيه من ربعك ذاكرينك بالخير يعني صاكينك بعين ولا اظلمهم وللحيطة خذ من اثرهم وتجنبهم أو اذا فيه شيخ راقي معروف عندكم خذ زيت وموية وتدهن فيه وتبي تشوف العافية .

7- جرب الكلام اللي قلت لك اقر سورة البقرة كامله اربعين يوم وقسمها 10 صفحات بكل فرض وشف وش راح يصير فيك وراح تذكر كلامي وابغاك تروح وتفحص وتسوي حمية غذائية علشان تطيب وبأذن الله بدال ما يصير اسمك منتضرالفرحة راح يكون الله شفاني .

8- كان ابوك وامك عايشين الله يخليهم لك ابيك تحب على رجلينهم وتقولهم يدعولك وادع لنفسك بجوف الليل واطلب ربك أنه يبين لك خطاك وصدقني راح يجيك حلم وتعرف وش انت مقصر فيه .
اخوي منتضر الفرحة والله لو اني ما استشعرت ان فيك مروه وطيبه كان ما قعدت اكلمك وانا وش مصلحتي اساساً كان اقول خله اخذت اجري منه نصحته ومكيفه لكن يعلم الله أني اشوف فيك الخير بس سبحان الله من جالس دانس يعني ابعد عن اللي معك هم اللي لاعبين فيك .

وفي الاخير اخوي منتضر كاني اخطيت عليك بشي أو قلت كلام ما هو فيك او في ربعك اعذرني وسامحني
أسال الله العظيم رب العرش الكريم أن يشفيني ويشفيك والمسلمين اجمعين اللهم آمين