ولا إطاله ولا شئ أخوي جسار , أنا كمان من زمان لي على المنتدى كنت مشغولة
سؤالك عن صديقتي اللي جربت السيروكسات , بصراحة انا ما أعرف بالتفصيل إذا كانت جاتها كل الأعراض الجانبية اللى قلتلك عليها أو لا .. يمكن بعضها , ( عارف لما الواحد يكون جنبك جالس مغثوث, و روحوا حتطلع ) .. هذا اللي أنا يمكن لاحظته عليها .. بس طبعا مو مني ... ( انا مقدرة ظروفها )..
و بصراحة كنت ألاحظها لما تقولي انها وقفت الدواء , تقريبا بعدها بفترة ( أسبوع ممكن ) بترجع حالتها و نفسيتها تتدهور ثاني .. أنا ما كنت بقولها .. الموضوع مرة طويل ..
المهم .. عني أنا .. لأني أعرف كمان انه هناك علاج سلوكي .. انا معتمدة عليه ..و مني ملاحظة اني محتاجة ادوية ولا شئ و الحمد لله .. انا الحين مشتركة في كثير من الانشطة , و شاغلة نفسي بأشياء مفيدة , تهمني و تهم مستقبلي و عملي و الله يوفقنى ..
وما ابغى أعيج معتمدة على دواء معين طول العمر - او فترة مرة زي كذة طويلة - عشان يظبط نفسيتي و يرسملي مستقبلي و تاريخ حياتي .. و الحمد لله انا الحين بنتعلم لسه من ذي الدنيا .. وهي كذا الدنيا تمشي .. نتعلم ونتخبط وناخذ دروس تطورنا في شخصياتنا .. و تدفعنا للأمام .. المهم الحياة ما توقف ..
و بالعكس كمان .. انه اللي حولي ما بيشوفونوا شخصية فيها رهاب بالمرة ..إلا احيانا بيشوفوني مرة اجتماعية .. و احيانا شايفة روحي .. انا بس اللى كانت نظرتي لنفسي كذة .. و المفروض ذي النظرة تتغير
و العموم .. انا ما بقول نوقف الدواء أو نمنعة .. انا بقول انه في وسائل اخرى للعلاج كمان احنا لازم نتبعها .. واذا احتجنا الدواء لا زم يكون تحت اشراف طبيب .. و انا مرة من مؤيدين جلسات العلاج النفسي .. و الاستشارات النفسية ,حتى لو في اللأشياء الصغيرة مرة, بنستفيد تجربة مرة حلوة بتدفعنا للأمام وتطورنا