المشاركة الأصلية كتبت بواسطة قطرات الندا

صباح الخير على الجميع
كيفكم ان شاء الله انكم بخير وطمأنينه وسعاده .
وش فاتني ؟
لما اقرأ مشاركات الالم واليأس اقعد افكر كثير بالاسباب ياترى ليه ؟
بغض النظر عن اللخبطه الكيميائيه بالمخ لكني صرت اعذر اللي يشعرون بالألم .. كم عضو بهالموضوع لاحظت ولا واحد ظروفه تشبه الاخر ولاحظت انه المصيبه عند شخص هي نعمه عند الاخر ولاحظت ان حتى لو كان العلاج سليم لكن البيئه سيئه مايشفى المريض ابدا ويظل يدور في حلقه محكمة الغلق بدون اي نتيجه .. تأكدت ان الانسان بالفعل ضعيف جدا لأن مو الكل قادر يغير ظروفه الاجتماعيه ولاحظت ان الايمان بالقدر خيره وشره ضعيف عند اغلبنا ونجزع من اي تغير سلبي .
انا هنا ما الوم اي احد انا هنا فقط افكر بصوت عالي .
هل بحث كل شخص فينا عن نفسه وعيوبه وتصرفاته ؟ ليه دائما نلقي اللوم على المرض والدكتور والدواء والظروف المحيطه ؟
هل عبدت الله حق عبادته مو بس عشان يشفيك ؟
هل تمنيت الخير لغيرك ؟
هل سعيت ان تفهم نفسك اولا قبل تفهم غيرك ؟
هل اشتغلت على نفسك لرمي احزانك وذكرياتك السيئه ورا ظهرك ونظرت لمستقبل بعين الرضا ؟
هل كونت لك صحبه جميله تساعدك بالخروج من اللي انت فيه ؟
هل جلست مع نفسك وطبطبت عليها وقلت لها بأن غدا اجمل ؟
هل فكرت انك مهما بلغت من الحزن والمرض واليأس ماراح يتغير شي في حالتك الا بأمر الله ؟
دائما نلقي باللوم على الظروف ونحن من نصنع اغلبها او نرضى ونستسلم لها .
دائما عندما تيأس فكر واسأل نفسك الى اي مدى راح توصلني هالحاله ؟ تخيل اسوء الاشياء وتذكر اسوء المواقف اللي مرت عليك هل قضت عليك او عدت وتلاشت ؟ كل شي بالحياه يمر ويعدي سواء زين او شين والذكي هو من يعرف يبرمج حياته على الرضا واقصد بالرضا هو الرضا الحقيقي مو بس كلام يكتب او عباره تنطق .
استسلم للحياه واجعلها تمر بسلام .
كلامي هنا ما اقصد ولا اوجهه لأحد معين انا فقط افكر بصوت عالي .
انا الحمدلله اموري تسير بشكل افضل وجميل وسلس بفضل الله وكرمه .
اللي مريت فيه خلال سنه اكتشفت فيه اشياء جميله مع انها كانت تجربه قاسيه اهم شي اني اكتشفت قدرة الله سبحانه على تغيير الحال بغمضة عين .
الله يغير حالنا وحالكم الى اجمله يارب .
ابو نجلا شلونك عساك طيب انا ابشرك بخير ونعمه ورضا بفضل العظيم سبحانه .
امس رحنا للعزيزيه والرطوبه عاليه لكن استانسنا وحنا راجعين اشتهينا قباقب مرينا سوق السمك وشرينا 10 كيلو وجينا للبيت وطبخناها وسهرنا على القباقب كنها فصفص فرشنا صماط وش كبره وابتدينا بالأزأزه والله ياهي متعه .
وبس وسلامتك 😊😊😊