|
بعد البرنتلكس أحس كأني محبوسة داخل روحي
السلام عليكم ورحمة الله وبركاته
حياكم الله أخواني اخواتي الكرام شركاء المعاناة و الأجر بإذن الله تعالى
اسمحوا لي اوصف شعوري بعد العلاج
انا لي شهرين على جرعة ١٠ ملجم
صحيح الحمدلله ان خفقان القلب الناتج عن القلق و الخوف خف و كذلك الدوران في نفس المكان لساعات طويلة لين تتفطر قدماي زال بفضل من الله
لكن احس بثقل داخل صدري ما اقدر ابتسم و لا لي خلق الكلام ضيق يقيد ضلوعي
يا نايمة يا صاحية متنحة احتار وش ابدأ بمهامي اليومية
تمر الساعات و انا مكاني ، ثقل بجسمي و خمول ما ودي اتحرك ، اتنهد و اختنق اذا بغسل ماعون لو كوب ، احسه جهد و انتظار ماله داعي
و اوقات اشرب فيه و انا ما غسلته من امس
ثقل و ملل و ضيق و وسواس لكن الحمد لله بسيط
يمكن من سنة ما سمعت انشودة او قمت بحياكة لو قطعة صغيرة ، حرفيا ما لي خلق
حتى كان عندي سير رياضي ، اعتلاه الغبار ما طلعته
اتعب من اقل مجهود و مالي خلق
اليوم الصباح اتصلت صديقة عزيزة بمثابة اخت ماهي صديقة و انا احبها في الله كنت افرح يوم تكلمني لأنها مشغولة بأولادها ربي يخليهم لها ، اليوم و هي تكلمني من ضيقة الخلق ودي تسكر أحس اني مخنوقة ودي اصرخ و اقول كفاية أبروح ،. مع انها تبارك الله خفيفة الظل و من الناس اللي تخليني طوال الوقت اضحك من تعليقاتها، دمها خفيف الله يحفظها . لكن اليوم اختناق مو طبيعي أعوذ بالله
احس حياتي متوقفة حتى مواعيد الوالدة قاعدة ااجلها عشان مالي خلق اخرج
اول الرهاب ما يخليني اخرج ، الحين الضيق
كل شي اشوفه ثقيل ثقل الجبال
برايكم متى تنتهي الحالة
ربي يشفينا جميعا الشفاء العاجل و لا يحوجنا لعلاج و ضماد
و جميع المسلمين
اللهم امين يارب العالمين
|