المشاركة الأصلية كتبت بواسطة عيون متفائلة

السلام عليكم ورحمة الله وبركاته

حياك الله أخونا

بالنسبة للموانع اللي ذكرتها كلها تهون مع احترامي ، الا الناحية المادية ، انت تقول أقل من المتوسط و بدون عمل ، صعب جدا الله يعين ..

انا من امس اتراجف بس عشان مرسلين لي يطلبون الإيجار و انا في حالة ربي عالم فيها ، رجع لي الخوف و الرجفة و القلق و عدم النوم و اوسوس اني ممكن انسجن لا قدر الله ، من يوم ما خلوا الضمان عايل و تابع ، اول كانوا يعطون كل مستفيد الف و ميتين ، الان فقط العايل و قلصوا المبلغ للخمس ، و باقي الاخماس ذهبت مع الريح ، بصراحة ما سووا بنا خير من يوم قرروا الضمان المطور ، عز الله انه مدمر مو مطور ..

أكاد أجزم ان سبب ما انا فيه الآن و تردي الناحية النفسية و الذهنية عندي كله من يوم ذي القرارات الجديدة ..
يا رب يتراجعون عنها و ينظرون لنا بعين الرحمة ، الغلا كل ماله في سعير ، و الدخل شح ، وين يلقي الواحد وجهه بس .


و اللي يرحمك من اقاربك يتعصر ثم يتردد ثم يرجع يتعصر و يحول لك ٥٠٠ ، اللي ما تجي عشر معشار احتياجاتك ، ثم ما تشوف غير غباره ، اللي يساعد مرة لبدن يساعد نوبتن أخرى

حولت لي خالتي قبل فترة ٥٠٠ يعلم الله يوم شفت الحوالة هلت دموعي من الحزن و قلة الحيلة ، لأنك تحتاج جدار تسد فيه الرياح العاتية عن بيتك و هم يرسلون لك قطعة طوب ، وش تسد وش تخلي ..


مع انهم تبارك الرحمن قادرين حتى يعطونك بيت ، لان كل اقاربي تبارك الله مافي احد حالته فوق المتوسط ، كلهم حالتهم فوق فوق فوق المتوسط و الكثير منهم أثرياء ،

خالتي هذي تبارك الرحمن هي و زوجها من عمر الدنيا يتاجرون في العقار في كذا منطقة لذلك تجاسرت و كلمتها بعد تردد ، لو هي ناوية تساعد كان شافت لنا لو غرفتين و رحمتنا من سعير الإيجار .. لكن اللي ما وده يساعد ما راح يساعد .. ما يحس بالنار الا واطيها ..


و سبحان الله الدنيا ورتني ناس كل ما زاد عطاء ربي لها زاد منعها و تمسكها بالدنيا .. حتى مو بالدنيا ، بفتات الدنيا و فضلاتها ، الحمدلله الذي عافانا مما ابتلى به غيرنا ..


و لا جو فرطوا بال ٥٠٠ بعد تردد و تعصر و ساعدوا بها الغير تلقاهم حاسين انهم سووا انجاز عظيم ، تصور الايصال ثم ترسله و تسوي تنبيهات بالواتس عشان انتبه .. بينما لو تطيح منها الف ريال ما درت عنها ..

يعني مصممين يحرجونك مرتين ، مرة يوم المبلغ ما يجي شي ، و مرة بالحفلة و التنبيهات ، ما بقي الا اخذ سيلفي مع الايصال .

و يوم من باب الذوق شكرتها .. قالت عادي اصلا المبلغ بسيط ما يجي قيمة علبة ضيافة حلا .. طيب يوم تدري انه بسيط و لا يسد قطرة من بحر ديوني ليش ارسلته و ليش تقول كذا .. عشان تمعن في احراجي يعني .. لأن هي نظرت له بنظرتها هي مو بنظرة المحتاج .. كأنها تصبر نفسها و تقول لنفسها ( عادي يا نفسي لا تزعلين و تنقهرين انك ضحيتي ب ٥٠٠ اعتبريها صحن ضيافة )

أسأل الله الكريم أن يزيدهم و يبارك لهم و يرزقنا من واسع فضله .. هذا مرض نسأل الله أن يعافيهم و لا يبلانا ..


اذكر واحد محبوس على دين ميتين الف و انسجن ، قام استفزع باخوانه و عيال عمه يساعدونه ، ما احد طالع في طخته الا اخوه جاب له الفين في ظرف ، قام ردها له مشكور ، نفس شعوري يوم حولت خالتي ال ٥٠٠ زادتني هم و ضيم و قهر كان ودي اردها لها و اشكرها .. لكن ادري وش بتقول ، تبي تقول فسقانة مافيها خير ما تستحق المساعدة .
وش بتسوي الألفين في بحر ال ٢٠٠ الف بعذره يبكي و يردها ..

لأن ما احد راح يحس فيك و هو ما جرب معاناتك ..

اللي يدري يدري و اللي ما يدري يقول : عدس

الله يكفينا شر العدس

مدري ليش ارتجفت يوم ذكرته


المهم خلك مع اللي يقوله لك نبيك عليه افضل الصلاة و أتم التسليم : فمن لم يستطع فعليه بالصوم فهو له وجاء .

وجاء اي وقاية من المحرمات الحمد لله

الحمدلله ان ديننا العظيم وسع بتعاليمه كل شي و جعل لكل شي مخرج ..

احلم بغد أفضل ما يمنع .. ادع ربك ما يدريك .. لعل الله يحدث بعد ذلك أمرا .. و لان ربك على كل شي قدير سبحانه ..

الحمدلله ان الخيال ابن الواقع .. و الحمدلله ان ما عليه جمرك ..

تخيل انك عايش بغد أفضل بس اسحبه معك للواقع كنوع من التخدير ، لان الواقع علقم صعب تذكره و اجتراره ، و لو قعدنا نفكر طوال الوقت انجنينا ..

دايم ادع بهذا الدعاء : " اللهم اكفني بحلالك عن حرامك و اغنني بفضلك عن من سواك"

أسأل الله الكريم أن كل من غفا و هو مكسور الأحلام .. يصحى على فرحة تجدد حياته ..

اللهم آمين يارب العالمين