|
إلى الاخصائيه نوره وباقي الأخصائيـــــات ساعدوني تعبت ):
بسم الله الرحمن الرحيم
السلام عليكم ورحمة الله وبركاته...
مشكلتي باختصار ومعليش اعذروني على ركاكة الاسلوب لاني مو متعودة اعبر عن شي يخصني .. دائم اكتم بقلبي ..
انا فتاة قريبا دخلت الـ24 عاما متخرجه من الجامعه .. محافظه ولله الحمد من اسره مستواها المعيشي والاجتماعي جيد جدا .. لي اخت تصغرني بسنه فقط لم تكمل الجامعة كانت موظفه وحاليا ماتشتغل ..
كانت علاقتنا مع بعض جدا رائعه ومحط انظار وحسد الاخريات يعني مانخبي شي عن بعض ابدا .. المهم في السنه الاخيره احس انه العلاقه بينا تغيرت مو مثل اول..
انا بطبيعتي انسانه حساسه جدا وعاطفيه واهتم كثير باللي حولي .. واصبت في السنه الماضيه بصدمة عاطفيه قويه والحمدالله اني كنت قويه وقدرت اتخطاها لكن الى الان مو قادرة انساها .. والحمدالله اني رجعت لطريق الحق.. فصارت كل ماصارت لي مشكله مع نفسي رميت سببها عالتجربه الماضيه .. والحمدلله على كل حاال.
اختي من النوع اللي انا احس انها انانيه وكثير قالوا عنها مغرورة وكنت ادافع عنها لكن اعتقد انهم صادقين في ذلك .. طبعا فيها طموح عالي ودائما تناظر للناس اللي اعلى منها وهذه نقطة الخلاف بيننا .. انا انسانه واقعية جدا وما احب اتكلم عن نفسي امام الاخرين .. لكن اختي مستحيل ماتتكلم عن نفسها في أي موضوع يعني لو احد يمدحها لازم البيت كله يدري .. واحيانا تمدح نفسها في اشياء هي تشوفها في نفسها ويمكن تكون غلطانه ..
ولما تكون اشياء مشتركه بيننا مثل الغرفه او الملابس او حاجه معينه .. ماتقول غرفتنا ..لا .. غرفتي .. وانا بسوي في غرفتي واغير غرفتي .. كانها غرفتها لحالها وتقولها بكل ثقه .. وهذي النقطه تقهررني كثير منها .. وماعمري تكلمت معاها في هالشي .. وادري انه سبب تراكم المشاكل والمواقف بيننا لكن شسوي انا طبعي كتومه
المهم صارت كثير من المواقف بيننا مثلا اذا كان فيه تصرف او كلمه قالتها ماعجبتني انا ازعل واكتم بقلبي وهي عادي ولا همها ومستحيل تجي وتقول وش فيك يا أختــــــــي !!!
مع اني لما اشوفها مع الناس وفي الاجتماعات العائلية اقول مستحيل تكون هذي اختي اللي معاي في نفس الغرفه .. فعلا هي محبوبه وقلبها ابيض وواثقه انها تحبني بس مدري ليش كذا اسلوبها وتصرفاتها معاي ..
لو اتكلم عن المواقف ما خلصت من الكتابه .. المشكله اللي انا فيها الحين .
اني ما اكلمها من تقريبا شهـــر واتجاهلها تماما ... لكن هي ولا عندها ولا حست فيني .. لما يكون فيه موضوع تبي تقوله لي عادي تناديني يافلانه !! يعني شوفيني بعدين تقول السالفه وخلاص .. طبعا انا عادي مااعلق عالسالفه ولا حتى بضحكه وهي خلاص طلعت اللي في قلبها وارتاحت .. وانا انقهر منها يعني معقوله انا بالنسبه لها بس مجرد شخص لازم يسمع اللي عندها يعني مو مهم عندها احساسي ناحيتها في ذيك اللحظه ؟؟!!
لحد يقولي يمكن ماانتبهت لزعلك لانه زعلي واضح .. مع بقيه اخواني اكون جدا طبيعيه واحاول اضحك بزياده لكن معاها موقفي يختلف ومع ذلك مافكرت فيني معقوله هذي اخـــــت ؟؟!!
ومن اسبوعين تقريبا صارت تطنشني وانا اطنشها ):
طبعا مستحيل اني اكلمها في الموضوع لاني سبق وكلمتها لكن مافاد معاها وهذا من فتره طويله ومو مستعده اكرر الموقف معاها مره ثانيه .. عن جد تعبانه نفسيا بشكل كبير .. تجيني حالات بكاء رهيبه .. احزن على نفسي انها وصلت لهالدرجه من الحزن .. احيان كثيره اكون جالسه مع اهلي وعادي يسولفون ويضحكون ولحد حاس فيني .. واقوم من عندهم وعلى طول عالغرفه وابكي بشكل محزززززن .. ليه هالبكاء ماادري
ماادري شسوي معاها لاني بالفعل محتاجتها ومشتاقه اسولف معاها .
طبعا هي ماتدري وش سبب الزعل هذا كله ويمكن هالشي خلاها واثقه من نفسها انها ماسوت شي ..
لكن هو بدر منها ومن امي الله يجزاها خير تصرف حز في خاطري وحسيت فيه تجاهل لي وخلاني ازعل عليها هي بس واكتم بقلبي ..
امي الله يطول في عمرها انا اكبر بناتها وبعدين اختي هذي والباقي اولاد ..
ماادري بس احس انها حاسه انه في شي بيني وبين اختي لكن ماحاولت تصلح الموقف .. يعني مطلعه نفسها من الموضوع وماشيه حياتهم عادي الى انــــا مقهوره وتعبانه نفسيا ومحد حاس فيني ..
هي من اسبوعين واكثر شوي ارسلت رساله على جوالي ابيات شعريه لكنها تحمل اسلوب الاعتذار.. لكن انا مارديت عليها .. ابغاها تجي تكلمني شخصيا .. مو معقوله في نفس البيت ونتبادل الرسائل .. ماادري فاهميني وحاسين بشعوري..؟؟
هل انا مكبره الموضوع بزياده ,, ولا فعلا اختي مقصره في حقي ؟؟
انصحوني وش اسوي عشان نرجع لبعض اخــــوات مثل اول .....
بلييييز ساعدوني.. واللي يقرا الموضوع ياريت يدعي لنا انه ربي تحنن قلوبنا على بعض
في امـــان الكريم
|