نفساني - عرض مشاركة واحدة

26-10-2005, 04:08 AM

السلام عليكم

اهلين بالجميع..

استشاره وكلي عشم انكم تفيدوني..

انا بحاول اتكلم عن نفسي بشكل عام ..انا انسانه اعتبر نفسي قويه واعتمد على نفسي تقريبا من الصغر ..مرت علي اشياء سببت لي الحزن من نهاية المرحله المتوسطه فارقت صديقتي ومرت علينا في البيت فتره اليمه بسبب مرض احد افرادها..بعدها تزوجت اختي اللي كنت عايشه تحت ظلها تقريبا..

بعد زواج اختي حسيت اني اكتئبت بس مااستسلمت كنت اقاوم الحزن قد مااقدر
واعيش حياتي..بس كنت احس نفسي اني مفارقه مو تناقض لكلامي
لكن اقول انا صح مفارقه وفاقده بس انا متصبره..

جات الطامه الكبرى وفاة امي اللي كنت اعيش معها وحدي بالبيت..والحمدلله الكل مستغرب من تصبري ..كالعاده قويه ومتماسكه وفي اقل من شهر داومت بالجامعه من اول يوم واقابل الناس وحياتي مشت طبيعيه..

بس الالام موجوده بداخلي صرت احس ان قلبي كانه صخره مو قلب ابكي بحرقه بس قلبي احسه نايم ميت مايبكي ماارتاح بالدموع بس ودي اطلع من قلبي بس مااقدر..

وغير كذا اكون عاديه في البيت بس لما اروح عند ناس احس بضيقة صدر واني مخنوقه اجامل وانا اتكلم اصلا احس اني اتكلم بصعوبه..

غير كذا احس بالم اقول وش فايدة قوتي الظاهريه وانا حياتي راحت كلها حزن 7سنين وانا احس اني مفارقه ..يوم جربت الفراق الابدي وهذا الموقف الصعب تندمت على ايامي اللي راحت وحزنت فيها ..ودي اعيش بدون الم داخلي..

وغير كذا اتمنى القى تفسير للي ذكرته..

ولكم جزيل الشكر..

**قلب طفله**

المصدر: نفساني