|
موضوع هام ويفيد الجميع .......مطلوب من الكل المشاركة
السلام عليكم
شلونكم بنات وشباب ؟ انشالله تمام واموركم طيبه؟
موضوعنا اليوم عن الصم والبكم ولغة الاشارة .
وابي الكل يشارك برضاكم ولا ترا غصب :)
>> داشه مستذبحه <<
يله نبدي :)
طبعاً العنوان مو محتاج تفسير ولا شرح يعني ابسط من جذي مافي صح ؟ صح ادري :)
كم واحد/وحده انحط بهالموقف من قبل انه يلاقي نفسه بموقف خل نقول محرج مع شخص اصم او ابكم او يحسبونك انت نفسك اصم او ابكم ؟
>>> سؤال غريب شوي ما عليه ، بقولكم شنو الطاري <<<
امس كنت بالمستشفى مع بنتي الصغيره طايحه وعلمت كدمه على خدها من الطيحه بس الحمدالله ، الله سلم وعدت على خير .
عموما انا معلمه بناتي اسمائنا بلغة الاشارة لأني شخصية أموت على هاللغة وهالعالم وبصراحه واخاف تنقدون علي بس احترم الي يتعلم لغة الاشارة ويحاول يستخدمها علشان ما ينساها .
>> تدرون كل شي يبيله ممارسه علشان ما ينشطب من الذاكره <<
ما اطول عليكم بس ابي ابينلكم الصوره الي كانت او الموقف بصورته الي انا مريت فيه.
كنا انا وبنتي الصغيره (4سنوات ) بغرفة الملاحظه قاعدين نلعب ونحسب على اصابعنا ونقول اسماءنا بالاشارة وإلا في بنت على السرير الي يمي عمرها تقريبا 17-18 سنه قاعده تطالعنا ومندمجه معانا انتبهة عليها بالصدفة.
جان تكلمني بلغة الاشارة ، طبعا انا بع 10 ثواني على ما ستوعبت الموقف جان يصير ويهييعطي الوان الطيف كلها :) >> من الاحراج <<
رديت عليها بالاشارة اني ما اتكلم لغة الاشارة جان تكلمني عادي ( بالحجي ) وسألتني عسى ما شر وهذا وتدرون باجي الكلام الي ينقال بهالمواقف .
المهم عرفت منها انها وااااايد مستانسه من اني اعرف من هاللغة ولو الشي البسيط ، وانها اهيه نفسها تعلمت هاللغة بالفطرة كون انها من فتحت عينها على هالدنيا وهاذي هي اللغة الوحيده الي تقدر تكلم فيها امها وتتفاهم معها .
تدرون هالموقف شنو اثر فيني وبطل عيوني على شغلات واااايد كنت غافله عنها ؟
- الحمدالله على العافية ، والله يكون بعون كل من يعاني من هالمشكله وغيرها .
قولوا آمـين ، ايه عفيه عليكم.
وكيه نكمل ...
تخيلو ان ام بموقف مثل هذا قاعده تحاتي بنتها ونتيجة تحاليلها وما عندها احد يفهمها الموقف او يشرحلها الموضوع غير هالبنت يعني صج موقف لا تحسد عليه وصج يفطر القلب.
اكملكم
تمينا ندردش ونسولف عن كم شغله اكتشفنا ان عندنا وايد اهتمامات مشتركة وعفيه لا تنقدون علي بس من ضمن الشغلات الي تكلمنا عنها ، دعيتها تكون عضوه معانا في نفساني ، لأن اهنيه تقريبا كلنا مودنا واحد او على الاقل مودنا قريب من مود بعض واهيه نفس الشي واحس انها بتكون عضوه فعاله اذا مو مميزه معانا اهنيه .
انا كتبت الموضوع ونزلت من غير ما اخذ اذنها بس القصد والله مو شماته ولا شي القصد اني ابين لكم موقف ممكن اي شخص ينحط فيه ولا تدرون شنو ردت الفعل الي راح تطلع وقتها .
أسئلة تطرح نفسها :-
-انت / انتي فكرت من قبل انك تتعلم لغة الاشارة ؟
- فكرة مرة بالصم والبكم شلون يتفاهمون وشلون ممكن تتفاهم مع احدمنهم؟
- فكرة انك اتعب نفسك وتحاول انك تنتبه على ( قراءة الشفاه ) ؟
- فكرة انك ممكن في يوم تحتاج لهاللغة وهالمعلومات سواء لك او لشخص آخر؟
( اعتذر على كتابة الموضوع بالعامية ولكنه بسبب العجلة والحماس لكتابة هذا الموضوع )
وسلامتكم ... يله ابي اشوف التواقيعكم تلق اهنيه وابي تفاعلكم الحلو يا حلوين :)
|