نفساني - عرض مشاركة واحدة

31-01-2009, 11:52 AM

فى صباح جديد ؛ هل بالتفاؤل والأمل ..

أقضيه فى اجازة ؛ بعيداً عن العمل ..

حبيت أغير روتينى وأعمل شىءجديد..

يبعد عنى السأم ؛ ويقلل شويه م الملل..

.................................................. .

صحيت م النوم متأخر ؛ على غير العاده ..

جهزت فطارى بنفسى ؛ وشربت قهوة زياده ..

وبصيت ع الأخبار ؛ ماأنا فاضى ومُش مستعجل ..

لا مرتبط بوقت يجرى ؛ ولا حركه على غير إراده ..

.................................................. .......

انتصف النهار عليا ؛ وأنا قُدَّام التليفزيون ..

أشوف برامج ونشرات ؛ وبرضه كمان فنون ..

ماشدنيش شىء جديد ؛ ولا أخبار مُلفته ..

كله مُكرر مُعاد ؛ وتيار الحياه فى سكون ..

.................................................. .............

حوِّلت ع النت ؛ ودخلت مُنتدى " نفسانى "

أقابل فيه حبايبى ؛ وأهلى وأصحابى وإخوانى ..

لقيت المنتدى فاضى ؛ والحركه فيه بسيطه..

الجديد قليل ؛ والقديم ما حبيتش أرجع له تانى ...

.................................................. ..............

وازيت بين " نفسانى " ومُنتدى " الزمالك " ..

حبيت أبُص على مشاكله ؛ وأحوال المعارك ..

لقيت الدُنيا هايجه ؛ وإضطراب ماعجبنيش..

صراع وطحن وانتقالات ؛ لا استقرار ولا تمالُك ..

.................................................. .................

رجعت لكُتبى القديمه ؛ وقريت " نجيب محفوظ "

كاتبى الأول بلا مُنازع ؛ وحُبى له ملحوظ ..

استمتعت معاه بسرد جميل وتراكيب حلوه..

رغم أن قريته كتير ؛ وأصبح كلام محفوظ ..

.................................................. ...........

عدى النهار ؛ والليل دخل بظلامه ..

قلت أعود لـ "نفسانى " أتسلَّى قُدَّامه ..

ماهو ده مكانى المُفضَّل وبيتى الحبيب طبعاً ..

اللى بيعجبنى واقعه الجميل ؛ وأحلامُه ..

.................................................. .......

وبكده انتهى يوم الأجازه ؛ وبكره أرجع العمل ..

وتعود كرة الحياة ؛ أشواق ولهفات وأمل ..

فى يوم أجازة جديد ؛ أقضيه على مزاجى ..

لحد ماربنا يأذن ؛ وتحين نهاية الأجل ...

( لو عجبتكم " رُباعياتى " أرجو إعطائى درجه من 10 عشان أعرف مستوايا )