نفساني - عرض مشاركة واحدة

30-06-2012, 07:49 AM

احتاج مشورتكم بعد الله سبحانه

اخواني وخوات هذا المنتدى الذي اعتبره الملاذ الوحيد بعد الالتجاء الى الله سبحانه وبث همومي وحزني فيه بصراحه مادري من وين ابتدي وانتهي لكن بدخل فى الموضوع على طول ..

انا لي تقريبا الان خمس سنوات ماشفت مكه ولا زرتها بسبب هالهلع وخوف السفر على الطريق .. اسافر بس للكويت وتستغربون سفري للكويت بس راح اوضح السبب والسبب هو انو الكويت على الخط لما تلتفت تشوف المناطق جنب بعض وفيها مستشفيات اقول فى نفسي حتى لو صار اي شي الا المستشفى قريب والحمد الله لكن السعوديه مسافات المناطق فيها بعيده يعني يبيلي ساعتين ولا ثلاث عشان اوصل للمستشفى

مشكلتي وين تقع ومتى يجني الهلع هو لا سافرت ووصلت الى خط تنقطع فيه الشبكه والمستشفيات بعيده قل ميتن ثلاث مية كيلوو هنا تبداء معي حالة الهلع والافكار هذي

نهايتك قربت ماتقدر توصل المستشفى المسافه بعيده تلتفت يمين يسار تشوف بس صحراء تطالع فى الجوال الابراج منخفظه . ومايخفكم الاعراض صداع شديد رجفه في انحاء الجسم تنشف الشفتين ثقل فى الجسم يالله احركه .. وضيقه شديده فى الصدر

كل ماسافر الى مكان فى السعوديه بنص الخط يجني الهلع اكثر من كوني فى المدينه الي اسكن فيهاا .. وازعج الي معي واقوله انا بموت ويخاف لما يشوف الاعراض ويرجع فيني ويوديني للمستشفى بس ادخل المستشفى وياخذون الفحوصات ويقولون سليمه ارتاح وشوي اشوف الهلع غادر .. الحين اهلي مصرين الى اني اروح معهم وانا بعد ودي السفر لامكه ومن زمان عنهاا ..

ابي مشورتكم احد سافر قبل هالمره ؟ وشنو صار معاه ؟!

هل تنصحوني اخذ احبوب منومه واكلها واصير طول الخط نايم . ؟!!

ولا عندكم طرق واساليب لا اشخاص مجربين انصحوني وافيدوني

طبعا العلاج تركته ماستخدم اي شي والهلع يجني فى اليوم مرتين وحده عند التعب الشديد والسهر ؟! ووحده قبل النوم .

المصدر: نفساني