نفساني - عرض مشاركة واحدة

17-05-2014, 06:19 AM

يالله .. خلصنا من الامراض والموت
وجينا بسالفة الجن

يابنت الحلال مافيه الا العافية
والله العظيم مافيك شي
هذا وسواس من الشيطان
ويسمى الاستباق في التصور قبل الحدث او ( زي كذا في علم النفس )
بمعنى انتي كنتي متخوفة من فكرة السحر والجن قبلها
وقلتي ابجربها وعلطوووول شبت عليك
لأنك تصورتيها قبل >> ان شاء الله قدرت اوصفها لك

على كل حاله ابقولك معاناتي في سالفة زي اللي حصلت لك
انا فيني هلع من كتمه وعدم توازن وخفقان واحس شي عالق في حلقي وصعوبة في بلع الريق

الزبده ان كل الشباب اللي اعرفهم عارفيني اني موسوس وعارفين وضعي اذا جتني الحالة
طبعاً اذا جتني الحالة علطوول اروح للمستوصف اخذ اكسجين وكشف وبالذات الكتمه ذي مجننتني

ما علينا .. مو هنا المشكلة

المشكلة وانا اخوك اني اسافر كثير
واروح واجي بالطيارة وماعندي مشكلة
رغم ان فيني هلع (( استمتع في الطيران ))

لين جاء ذاك اليوم المشؤوم من واحد من الشباب .. الله يسامحه
تسبب لي بإنتكاسة في حالتي
والى يومك هذا ماعاد احب اشوفه
حتى وانا مسامحه لكن نفسي تشمئز منه

قالي متى بتسافر لحايل
قلت بكرا انا وابو فلان خاونا
قالي .. لا مشغول .. بس تخيل تجيك حالتك وانت في الجو
لا فيه مستشفيات ولاتقدر تسوي شي والا بينزلون الطيارة عشانك ( طبعاً قالها من باب الضحك والمزح ) .. الله يهديه

وركبت في راسي .. ولقطها الشيطان وبرمجها في مخي

وتصدقين من ركبت الطيارة وتوها مقلعه
جابها لي الشيطان .. وتصورت الموقف
وبدأ ريقي ينشف وبديت اتنهد واحاول اتثاوب بالقوة (( بدايات الهلع ))
شوي وتزيد .. وتتطور لخفقان وبعدها طقتني الكتمه

بغيت اموووت
والله العالم صاروا يتفرجون وخايفين علي او انهم خايفين مني
ومعرق بقووه

واللي معي كلم المضيف
وغيروا مكاني قدام عند الكابتن
وجابولي اكسجين ..

واشوا ان الرحلة لحايل وقريبة
اجل لو كانت بعيده وش كنت ابسوي ...؟

فـ هذي التجربة اللي مريت فيها ممكن تفيدك

ان هالشي اللي فيك

لا سحر .. ولا جن .. ولا بطيخ

كله وساوس شيطانية .. قدرت تدخل عليك من باب التصور قبل الحدث والفعل

وبمجرد القيام بالفعل
تبدأ بالوسوسة ويبدأ العقل يرسل اشاراته لكافة الجسم
ويحدث الاضطراب بجميع انواعه

يعني شيلي فكرة الخرابيط من راسك
وتوكلي على الله

واللي فيك وسواااااس .. تبين احلفلك مره ثانية
والله العظيم .. وسوااااس